• #Cycle 3
• #Cycle 4

Waasserkreeslaf fir déi Grouss

De Waasserkreeslaf an der Natur

D’Waasser ass en éiwege Kreeslaf, zwëschent der Atmosphär an der Äerd. Mee firwat? Do spillt d’Sonn eng grouss Roll. Si liwwert d’Energie fir de Waasserkreeslaf um dréinen ze halen.

1. Verdonstung

Eng wichteg Roll spillen dobäi d’Weltmierer. Iwwert déi riseg Fläche vun de Mierer verdonst vill Waasser. Hei verdonst e vill méi groussen Deel wéi iwwert dem Land. Si liwweren ëmmer genuch Fiichtegkeet.

2. Wolleken

Duerch d’Loftzirkulatioun an der Atmosphär vun eiser Äerd, gëtt dat verdonste Waasser, als Wolleken, iwwert de Globus transportéiert.

3. Reen a Schnéi

D’Waasser, dat an de Wolleke gespäichert ass, fält iergendwann a Form vu Reen, Schnéi oder Knëppelsteng nees op de Buedem vun der Äerduewerfläch.

4. Waasser sammelt sech

Zwee Drëttel vum Waasser vun den Nidderschléi iwwer Land verdonst. Dat wat net verdonst, fléisst iwwerierdesch of oder versickert am Buedem.

Dat Waasser wat versickert, bilt eist Grondwaasser.

Wéi vill Waasser versickert, hänkt vun der Form vum Terrain an vum Buedem of.

5. Et geet nees lass

D’Grondwaasser an d’Waasser an de Baachen a Flëss, mécht sech op de Wee a Richtung Ozean.

Alleguerten d’Waasser op der Äerd ass an deem Kreeslaf. Iwwerall do wou d’Waasser duerch d’Sonn opgewiermt gëtt, klëmmt et als Waasserdamp an d’Atmosphär, bilt Wolleken, fält dann iergendwann als Reen oder Schnéi nees erof a mécht sech op seng Rees.